هالأرض فيها من البشر أجناس
في بشر ناس و في بشر مش ناس
في ناس دوم جبينها عالي
و في ناس لازم بالقدم تنداس
في ناس راسها من العقل خالي
بدل الفكر بعقولهم وسواس

في ناس لازم ياكلوا نخاله
و في ناس بين عيونها بتنباس
في ناس عم يمشوا متل آله
شكلها حلو جوه تنك و نحاس
في ناس خلقوا معدنُن غالي
و عندُن قصر أغلى من الألماس

في ناس قضّوا العمر بطّاله
كانوا عـ خزنه فاضيه حراس
في ناس هودي بيشغلوا بالي
عندُن جسم لكن ما عندُن راس

في ناس فوق الخيل خياله
قلبُن بأرض المعركه متراس
في ناس للأسرار طبّاله
بيحكوا حكايا بتحبس الأنفاس
في ناس للأخبار نقّاله
روحُن أكيده مخاويه الأنجاس

في ناس لو سهروا مع الوالي
عندُن وزن بالجوهر بينقاس
و في ناس عقلُن كومة زباله
ما الن دوا إلا عصا الكنّاس
في ناس خلقوا عَ الدّني عاله
في ناس عبّوا من الدّهب أكياس

هيدي البشر عندُن 1000 حاله
عندُن وفا و بقلوبهُم إحساس
في ناس من الأخلاق ميّاله
في بشر ناس
و في بشر مش ناس